شنطه حصري لصفحة روايات رولا
— بتبيعي نجف وأطباق؟ —ضحك باستهزاء وقال—: أهو على الأقل ترحميني من المياعة وطلب الفلوس.. بس خلي بالك، شغل البيت ميفوتش منه الهوا، والبيت يفضل ماشي زي ما هو.
— أكيد.
أول أسبوع في الشغل كان مطحنة، بس كان رد روح. كنت بنام ساعات قليلة، وبذاكر الحملات الجديدة، وبرجع عضلات مخي اللي كانت ماتت من القعدة. يوم الجمعة قفلت صفقة كبرى مع شركة عقارات كانت معصلجة معاهم بقالها شهر.
رانيا وقفت على باب مكتبي وابتسمت:
— أنتِ مكنتيش مكسورة ولا نسيتي الشغل يا هدى.. أنتِ كنتِ محبوسة بس.
مردتش عليها، بس كلامها كان صح مية في المية.
لكن الشغل مكنش كفاية.. أنا كنت محتاجة إثباتات.
والفرصة جاتلي يوم الأحد. حازم ساب التابليت بتاعه بيشحن في الصالة ودخل ياخد دش. طول عمري بعيدة عن حاجته وما بفتشش، بس المرة دي فتحته.
لقيت الفولدر المسحوب على الإيميل مكتوب عليه “حسابات T”. جوة الفولدر كان في كشوف حساب تحويلات وإيصالات. الفلوس كانت بتعدي الأول على حساب أمه “سوسن”، ومنه لحساب أخوه “هشام”.
والأدهى والأمر.. المليون وأربعمائة وثمانين ألف بتوع شقتي اللي بعتها زَمان! لقيت تحويل بتاريخ قديم طالع من حساب البيع لحساب تاني باسم حازم كاتبه “مدخرات شخصية”!
لقطت صور بكل حاجة بتليفوني بسرعة.
وبعدها فتحت الجروب العائلي بتاعهم على الواتساب اللي أنا مش فيه بالصدفة.
قريت رسائل القديمة:
“اوعوا هدى تحس بحاجة لحد ما تكتبوا عقد الشقة باسم هشام.”
“هي اصلاً عمياء ومبتفهمش في الحسابات.”
“طول ما هي فاكرة إن مفيش فلوس، مش هتوخوشنا بموضوع عملية أمها.”
وقفت مذهولة، والدم جمد في عروقي لما قريت أحدث رسالة من أمه سوسن:
“لما هدى تبدأ تاخد مرتبها من المحل الجديد، خليها تحوله على حسابك يا حازم.. الستات دول لما بيمسكوا قرش في إيديهم بيتقرعنوا.”
ساعتها سمعت صوت المية وهي بتقفل في الحمام.
قفلت الشاشة فوراً، ورجعت التابليت مكانه بالظبط، وأخدت نفس عميق.
المناهدة والخناق مكنش ليهم لازمة خلاص.
أنا دلوقتي مش عايزة أتخانق.. أنا عايزة أعرف إزاي أسترد كل مليم أتاخد مني، وأخد حقي بالقانون، وأخرج من الخرابة دي من غير ما أسيب أثر ورايا ولا أدي لواحد فيهم فرصة للتحكم في حياتي تاني!
الجزء الثاني
يوم الإثنين مروحتش الشركة الأول. طلعت على مكتب محامية متخصصة في الأحوال الشخصية وقضايا المعاملات المالية اسمها الأستاذة نهى مهران. فرجتها على الصور وكشوف الحسابات القديمة اللي كانت معايا لشقتي المعادي والرسائل المصورة.
