خطيبي اعلن حصري لصفحة روايات رولا
— أنا مش عايز أخسرك يا فريدة!
فريدة بصتله بجمود لثواني وقالتله:
— طريقة غريبة أوي عشان تبتثبتلي بيها إنك متمسك بيا!
سابته ومشيت.
فريدة شغالة أخصائية جراحة عامة في مستشفى السلام الدولي بقالها 5 سنين، دخلت بالامتحان والمجهود، قضت نبطشيات بالموت، وعمرها ما استغلت مكالمة واحدة من أهلها عشان تاخد ميزة ولا كوسة.
تقريباً محدش في المستشفى يعرف إن اسم “الحسيني” مش مجرد اسم ثلاثي والسلام.
أبوها، طارق الحسيني، رئيس مجلس إدارة واحدة من أكبر المجموعات الاستثمارية في مصر، استثمارات في معامل التحاليل، المستشفيات الخاصة، شركات أدوية، وتكنولوجيا طبية.
فريدة كبرت وسط اجتماعات مجلس الإدارة، الحراسة، والعزومات اللي بيتكلموا فيها عن صفقات استحواذ بمليارات زي ما الناس بتتكلم عن حالة الطقس.
ولما جابت 27 سنة، سابت الإسكندرية وجت القضايا في القاهرة.. ما كانتش عايزة تتقال عليها “بنت طارق الحسيني”، كانت عايزة تبني اسمها بنفسها.
وف القاهرة اتعرفت على كريم.. كريم ابن عيلة معروفة في الوسط الطبي، أبوه الدكتور طلعت الشاذلي رئيس جمعية الشاذلي الخيرية، وده واحد من كبار المتبرعين والداعمين لمستشفى السلام.
طول 5 سنين، كريم كان بيبعدها عن أهله ويتهرب من إنه يقدمها رسمي، دايماً عنده حجة: أصل أمي صعبة، أصل بابا مشغول، أصل أختي مسافرة.. وفريدة كانت بتعدي وتقول بكرة يتصلح الحال، ودلوقتي بس عرفت إنها كانت بتخدع نفسها.
في نفس اليوم، أخدت ضربة تانية..
وهي داخلة غرفه الأطباء، كانت في 2 نواب بيتكلموا، أول ما شافوها سكتوا فجأة، وواحدة منهم استخبت تليفونها بسرعة.
فريدة مدّت إيدها:
— وريني التليفون.
— يا دكتورة فريدة والله…
— هاتي التليفون حالاً!
أخدت التليفون، كانت صورة نزلتها ريجينا اللبّان، كريم واقف جنبها في عشوة خاصة، ومكتوب تحت الصورة:
“وأخيراً العيلتين رجعوا للمكان اللي المفروض يكونوا فيه”.
الصورة نازلة من 6 أيام!
فريدة حسّت بنار جواها، بس في حاجة شَدّت انتباهها.. ورا كريم وريجينا في الصورة، كان قاعد الدكتور طلعت الشاذلي ومصطفى اللبّان والد ريجينا، وعالمطبخ كان في ملف مفتوح مكتوب عليه:
“مشروع المبنى الجديد — إعادة الهيكلة المالية”.
المبنى الجديد ده كان أكبر وأغلى توسعة لمستشفى السلام الدولي، وكانت طالعة عليه إشاعات كتير إن المشروع واقف وتكاليفه خرجت عن السيطرة، وخلال الأسابيع اللي فاتت في أوامر جات لرؤساء الأقسام بتقليل المصاريف والضغط على العمالة.
