كنت فاكره حصري لصفحة روايات رولا
— انتوا مأوفرين ومكبرين الموضوع، أنا عمر ما سرقت من حد حاجة!
هبة ضحكت ضحكة مكسورة:
— لسة ملحقتش تقصد!
طارق طلع من الشنطة صور الدعوة الإلكترونية، والمكالمات المسجلة وهو بيطلب نكتب الشقة باسمه، والورق اللي بيكشف إن الجمعية ملهاش وجود.
وشّه اتغير 180 درجة، وما بقاش الراجل الحنين اللي بيجيب قهوة ويكتب جوابات رقيقة، صوته بقى ناشف ومستفز:
— يا ندى، انتي عارفة أنا عملت عشانك إيه وتعبت قد إيه!
— لأ.. أنا دلوقتي عرفت انت كنت بتخطط تعمل فيا إيه!
— أنا حبيتك بجد!
— وحبيت هبة هي كمان؟ ولا اخترتنا إحنا الاثنين عشان فاكر إن البنات اللي على كرسي متحرك هيكونوا صيد سهل وتعرف تضحك عليهم وتستغلهم؟
لأول مرة يفقد أعصابه ويصرخ:
— متقوليش عبط وبطلوا هبل!
هبة ضربت إيدها على الترابيزة:
— بص في عيننا وجاوب!
قبل ما يرد، دخل القاعة اتنين أمناء شرطة ومعاهم ظابط مباحث. طارق كان مقدم بلاغ من كام يوم بخصوص انتحال الشخصية والنصب.
وهناك كانت الصدمة الثانية..
الظابط مكنش جاي بس عشان البلاغ بتاعنا، طلع الباشا اسمه الحقيقي “أحمد عصام”، وسجل حافل قضايا نصب على كبار السن وذوي الهمم! كان بياخد فلوسهم بحجة إنه بيخلص لهم معاشات واستثناءات حكومية، ودخل السجن قبل كدة وبعد ما خرج غير اسمه ومحافظته وطريقته كلها.
كان بينقي البنات اللي عندهم ممتلكات وأهاليهم خايفين عليهم، ويعمل دور المنقذ والمضحّي!
جالي هبوط وحسيت بإرجاع..
افتكرت كل مرة كان بيقولي فيها “أنا هشيلك في عيوني وهكون رجليكي”.. مكنتش حنية خالص، كانت رغبة إنه يلغي وجودي ويسيطر عليا وعلى اللي حيلتي!
أحمد بدأ يصرخ إننا بنتبلى عليه وإن الشرطة فاهمة غلط وإننا بننتقم منه عشان رفضنا! أمي قربت تنزل فيه، بس أنا رفعت إيدي:
— سيبيه يا أمي.
قربت بالكرسي لحد ما بقيت قدامه على بعد شبر:
— أنا طول السنين اللي فاتت كنت فاكرة إن الحادثة كسرت أجدع حاجة فيا.. انت شفت الجرح ده وفتكرت إنك شاطر وتقدر تستغله، وده كان أكبر غباوة عملتها في حياتك!
— يا ندى عشان خاطري تسمعيني..
— مسميش ندى بحنيتك المزيفة دي تاني، انت مالكش حق تنطق اسمي اصلاً!
الشرطة أخدته عشان التحقيق، ورحنا كلنا نعمل أقوالنا ونقدم المستندات.
افتكرت القصة خلصت هنا.. بس لأ.
بعد أسابيع، ظهرت قضايا ثانية؛ ست كبيرة في السن من طنطا بلغت إنه ضحك عليها وأخد تحويشة عمرها بحجة يشتري لها جهاز تنفس، وراجل كبير من الجيزة أخد منه فلوس عشان إعفاءات طبية.
