شيماء 3
حازم: معاك… بيعملوا ايه في بيوتهم؟؟ هاه؟؟ انا اي مجهود بيتعبني… يعني علاقتي بيها هتكون زي اتنين متجوزين مثلا بقالهم عشر سنين.. وده في شهر العسل فمابالك بعد سنه مثلا؟ وما بالك لو انا حالتي اتدهورت وبقت اسوأ؟؟ علي: برضه يا حازم مش ده الحل… وبعدين ايه يعني؟ في بنات كتير صغيره بتتجوز رجاله فوق الستين فهل دول بيبقوا زي الشباب؟؟ لا طبعا بس اهو الحياه بتستمر حازم اتصدم من علي واتجـ,ـرح بس علي ما اخدش باله
حازم: روح يا علي من هنا علي: لا مش هروح انت قاطعه حازم بزعيق: انت لسه مشبهني براجل فوق الستين بيتجوز عيله!!! انت عارف انا عمري قد ايه؟؟ بس معلومه بسيطه العيله اللي بتتجوز راجل فوق الستين وبتعيش معاه غالبا بتبقي طمعانه في ثروته وبتتمناله المـ,ـوت النهارده قبل بكره علشان تورثه وسبق وقولتلك شاهندا غنيه… عندك اسباب تانيه او تشبيهات تانيه؟؟ علي: انا اسف يا حازم ما اقصدش بس مش انت برضه اللي تاخد القرار ده هيا بتحبك
حازم: عارف انها بتحبني وعلشان كده مش هستحمل منها ان الحب ده يتحول لعبء وحمل هيا مضطره تستحمله… مش هستحمل احس بندمها او اني بقيت عاله… انا سبق وحسيت الاحساس ده ووجعني قوي وماعرفتش اتخلص منه لحد النهارده فاعذرني مش عايز احسه تاني علي: ولما انت موجوع من الاحساس الاولاني بتعمل ايه هنا؟؟ حازم: الظروف اتغيرت وبعدين شوق حاليا اللي محتاجاه انا اقدر احققهولها علي: اللي هو ايه؟؟ حازم: مستقبل كويس ليها ولبنتها… هيا محتاجه فلوس وانا عندي فلوس كتير اقدر اقدمهالها.. هيا لايقه عليا وانا لايق عليها
علي: انت بتنزل من قيمتك قوي حازم: رحم الله امرئ عرف قدر نفسه… وانا عارف قدراتي ايه انت بقي مش متقبلها دي حاجه ترجعلك… انا قولت اللي عندي ومعنديش كلام تاني… اتفضل روح لشاهندا وانهي كل حاجه اتفضل سابه حازم ودخل اوضه النوم لشوق اللي سابتهم من بدري لوحدهم وقعد جنبها علي السرير من غير ولا حرف وفضلوا ساكتين لحد ما سمعوا قفلت الباب واول ما حازم سمعها غمض عنيه ورقد علي السرير حازم: ممكن تسيبيني لوحدي شويه يا شوق؟؟
شوق: حازم انا حازم: لو سمحتي خرجت وسابته وهيا مش عارفه ان كانت تفرح ولا تزعل انه ساب خطيبته؟؟ جزء منها بيقولها افرحي بس كسرته دي بتدمرها هيا… وفجأه حست انها مش هتكون مبسوطه حتي لو هو عاش معاها لان هو قلبه مكسور… الظاهر انه بيحب شاهندا قوي…. علي خرج من عند حازم وهو موجوع قوي عليه ومش عارف يعمل ايه؟ بس حازم منطقه صح جدا؟؟ لكن شاهندا برضه بتحبه ومستعده لاي حاجه معاه…. هو مقتنع تماما ان الصح انهم يتقابلوا ويتكلموا مع بعض الاول وده الصح
